Issa li fuq il-mewġ tal-bieraħ.

Issa li fuq il-mewġ tal-bieraħ

Niżlet ix-xemx tal-għass,

Is-sema sar djamanti

Imelles xfar il-blat,

Int miegħi tista’ tgħodos

Fil-baħar tas-sorpriżi.

Tinbet għalxejn il-warda f’nofs ta’ xahari

Tinfed il-blat u tiċħad l-art tat-tama

Għax bħali għad issir. . . indifferenti,

L-allat tisfida u tikber waħdek

Fil-libsa mlaħalħa

Tas-skiet li ma tifhimx.

Jekk trid għad tista’ wkoll tisseqqer tibqa’

Taħt sema li jinfirex mal-burdati

Imbagħad fil-baħħ t’għajnejja tibda tħares

Biex mingħalik trid tikxef għad

ix-xefaq li ma deherx.

U l-aqwa ħaġa tkun xħin jiġi l-lejl

Xħin jaqgħu id-djamanti

U tibda l-avventura.

Alfred Grech

05/06/2014