Issaltan fuq art barranija.

Issaltan fuq art barranija,

Titperreċ u toħlom il-bqija,

Mingħajrek staqsewni fejn sejjer

Kull fejn mort, bla wiċċ u bla ħtija.

Ta’ reġina passejk:

La ’l-hawn u lanqas ’l-hemm ma tħares,

Xewqati bħar-riħ

U ħarsetek, tpatti qares.

Daqs warda senswali xuftejk

Sbuħitek bħal tina miftuħa

U terħi riħa

Li ħliefi ħadd ma jxomm.

Il-ġnien tiegħek ilellex

Il-kulur tal-irtokki.

Ġismek mewġa moħlija

Mar-ramel tax-xatt f’għodwa sajfija

Xewqatek tfajla moħbija

Xħin taqa’ u tistordi mifnija

Bħal qoxra tal-baħar mormija

U f’moħħi t-tagħbija.

Alfred Grech

31/03/2014

Għidli.

Għidli,

 X’ikun dal-baħħ li nħossu jissukkani

Xħin int ukoll issir għalija żejjda?

Tfittixni u ma ssibnix għax mhux inlaħħaq

Mar-ritmi tiegħek.

It-tqanqiliet,  nokkli tax-xahar imħabbel

Iġorrhom marbutin fil-ħabs tal-bieraħ

Ir-riħ mix-xlokk imdejjaq.

L-alka tal-qiegħ sa waslet fuq ix-xtajta

Mal-bews tas-sema mċajpar.

Bħan-nida ta’ bla ħoss tinżel imħabbtek,

F’sider is-swied il-qalb, bla velu, bla skuża,

U r-ruħ għal dejjem tibqa’ tonfoħ

Ix-xaghar imħabbel.

Alfred Grech

28-03-2014

Li kieku.

Li kieku kelli nikteb il-memorja

Mhux biex l-istorja ndawwar kif nixtieqa,

Jew biex min jiġi wrajja jaħseb fuqi

Kif xtaqtu jiena.

Li kieku kelli għad jien nerġa’ nterraq

It-toroq u sqaqien mgħawwġin tad-dinja,

Ma nittaqqalx bit-toqol tal-imgħoddi

Niltaqa’ miegħek.

Li kieku tħares lejja b’dik il-ħarsa

U qabel il-kundanna kull jum tqassar,

Jien ngħalaq kull kapitlu li qrajt s’sissa

Mingħajr ma ninsa.

Li kieku minn fejn qiegħed nerġa’ lura

U nerġa’ niġi ħdejk għax rega’ bdieli,

Bħal meta tfajjek kont u xejn ma kelli. . . .

U mhux li kieku!

Alfed Grech

27-03-2014 

Bħas-sriep li jarmu l-ġilda.

Bħas-sriep li jarmu l-ġilda,

Ilpup li saru ħrief,

Xħin jilbsu bħal ħaddieħor,

Kull wieħed sar tellief.

Intasbu wara mejda,

Għax tagħhom hu l-każin,

Ma jingħarfux minn kliemhom

Iwensi lil xulxin.

Ilkoll liebsin il-maskra,

Bħal kotra ħallelin,

Iljuni tilfu snienhom,

U baqgħu migdudin.

Ilpup li tilfu l-ġilda,

‘Mma l-vizzju ma tilfuħx,

U min warajhom mexa

Lil dan dawn ma jafuħx.

Alfred Grech

26/2014

Għalxejn din it-tfittxija.

Intbaħt illi għalxejn din it-tfittxija,

Għax int ilek li tlaqt u sibt pjazza oħra,

Jew għadek hawn fil-masġar tfittex fetħa

U jekk ma tlaqtx, tistaħba minni qiegħeda.

U ntbaħt li qiegħeda tagħmel dak li darba

Jien kelli nagħmel.

Bqajt indur żugraga

Mhux il-għaliex xi darba ħsibt li nsibek

Inkella biex narak għall aħħar darba,

Għaliex jien lanqas naf! Għax hekk imdorri.

Alfred Grech

25-03-2014

Kull meta jkolli lilek.

Kull meta jkolli lilek tredden ħdejja

Jgħaddili ħsieb minn moħħi u nibda’ nħobbok,

Ninduna wkoll għaliex fil-manikomju

Hemm nies li ma sabux tal-ħajja rkaptu;

Inqaflu wara ħajt ta’ protezzjoni.

Jien ma jibqagħali xejn x’nitkixxef aktar.

Kell meta jkolli lilek tredden ħdejja

Insir jien l-eżiljat maqtugħ mis-saltna,

Insir fil-bogħod bħal waħx li qed jistenna

U noqgħod bejn il-lasti nilgħab logħoba

U titlaq tiġri ‘l-hemm il-poeżija.

Alfred Grech

24-03-2014

Waqtiet 2

Waqtiet, jum wara jum tas-skiet fil-mixi,

Pass, pass fuq dan ir-ramel f’xatt il-baħar,

Għafsiet il-qalb max-xfar misnun tal-gebel,

Il-ħlewwa tal-qanqiena li qed tidwi

Fil-qiegh mudlam tal-ħajja.

Bħal kieku qed tismagħni imbagħad tweġibni,

Kull  xħin iż-żiffa riħ ma wiċċi tmelles,

U leħnek jgħaddi sbrixx minn ma widnejja,

Tqanqil il-qalb li jobżoq mewġ il-baħar,

B’riħet il-melħ li jinxef fuq il-ġilda.

Jien ma rrid xejn u xejn mhu qed nitolbok,

Bħal meta tgħid li tbusni.

Jien ma rrid xejn u xejn mhu qed nitolbok

Kull xħin il-minutiera taqbeż qabża,

Int tgħid li nbdilt u jiena nibda nemmen

U ngħidlek: ma ngħaġġlux biex aktar nisma’

It-tokki tal-arloġġ għax wasal żmieni,

U tibqa’ tħares lejja u tisfidani.

Sal-qiegħ nixorbu l-kalċi.

Alfred Grech

22-03-2014

XCIII.

Imqar fis-skiet tal-lejl jien nisma’ leħnek

Inħarsu lejn xulxin bla ma nitkellmu,

Bħal mutu nibki s-swied li hemm ġo qalbek

U l-kwiekeb jgħaddu sbrixx mingħajr ma jsellmu.

U naħbtu wiċċ imb’wiċċ ma kull tisbita

Par bċieċen imqerrxin fil-ħin li skada,

U ħierqa ġewwa fija dit-taħdita

Li bdiet fis-skiet tal-lejl qed jokrob l’għada.

Ġo fija hemm il-ksieħ tal-ilma ġieri,

Xħin wiċċek jiddi rajt fid-dawl tal-kwiekeb,

U bħali ssir imbagħad taf  x’jiġifieri,

Kull xħin tarani ġej fuq żiemel riekeb.

Mirduma għadek taħt il-lejl tistenna,

Bħal xefaq li jingħalaq għax sar ġenna.

Alfred Grech

17/03/2014.

Qatt taħseb.

Qatt taħseb illi ż-żmien iħassar sejjer

Tqaqnqil ir-ruħ u r-raghwa li tiġini,

Il-qalb li tgħix il-waqt mingħajr ma taħseb,

Ix-xmara demm ibaqbaq ġewwa l-vini.

Qatt taħseb illi taħt l-uġigħ għad nogħtor

Ngħix qisni kont miblugħ u xejn f’idejja,

Jekk ma tafnix trid tħares fiss f’għajnejja

U tara jien min jien xħin tiġi ħdejja.

Qatt taħseb li m’għadnix inħoss il-qawwa

Bħal meta zgħażugħ kont mgħix għal ġurnata,

Bħal żiffa riħ li ġismi xewk, xewk tqanqal,

U ħadd u xejn ma jbiddel il-burdata.

Alfred Grech

15-03-2014

Jien ngħereq ġol-għadira tas-skiet tiegħek.

Jien ngħereq ġol-għadira tas-skiet tiegħek,

Fil-baħar ta’ bla xtut indoqq it-tokki,

U mnalla kien il-ħolm biex nista’ nħobbok

U lilek nara aħjar mingħajr irtokki.

Jien lilek ma narax minn lenti oħra,

U jista’ jkun tqil wisq it-toqol tiegħek,

U jista’ mhu tqil xejn għax mhux ħlief għafsa

Li tgħaddi mal-oħrajn fil-mixi miegħek.

Kull xħin jispara l-għaraq fuq il-ġilda,

Fin-nixfa lli tiġini xħin tkun ħdejja

Fi nżul ix-xemx fil-ħmura ta’ fl-għaxija

Bħal xmara dil-burdat tibqa’ għaddejja.

Kaskati t’ilma għaddej minn taħt l-arkati

Mingħajr ma qatt niltaqgħu int u jiena,

Bħal ħmar qammas tal-ħin ir-rota jdawwar,

Moħlija din l-imħabba f’qalb għajjiena.

Alfred Grech

12-03-2014