Lil Sonia.

Għax aħna t-tnejn nixxiebħu

Twelidna f’post ħażin u qatt ma ltqajna,

U nafu lil xulxin kull xħin nilgħabu

Jien bil-qamar, int bix-xemx

Ġo sema kollu kwiekeb.

Imbagħad bdiet nieżla z-zita. . .

Għax aħna t-tnejn nixxiebħu

U jiena kont xi ħadd li qatt ma stenbaħ

U int għaraftni.

Kien hemm xi żmien li xtaqt ngħannilek

Għax naf li meta nghanni

Inti tifhimni

U ħbatna ma xulxin

Xħin ħaddieħor fl-iskart irmiena,

Xħin jiena bdejt bil-qamar nilgħab,

Inti bix-xemx,

Ġo sema mingħajr kwiekeb.

Għax inti kont  is-sema, jien il-baħar.

U jien lanqas kont hemm

Xħin bdiet ix-xita traxxax,

Għax min fix-xita twieled

Xortih ħażina.

Alfred Grech.

30-06-2014

Ma twebbilnix.

Ma twebbilnix

Kull xħin għall-ħoss tal-lira

Tgħannili l-għanja antika tas-sireni

Bil-passi qed joqorbu

U jien bix-xemx f’idejja.

Ma nisimgħekx,

Ukoll jekk għad nitebaħ

Bir-ritmu misterjuż quddiem l-udjenza

Ta’ dawk riġlejk itakknu.

U ma nemmnekx

Jekk tobżoq għad il-qares kollu

Mal-kliem li żżomm marsus bil bews stirati

Ta’ dawk xofftejk.

Għaliex m’hemm ebda kelma li nfassluha

Li biha għad xi darba nfissru nistgħu,

Ix-xewqa li ssib rokna qalb ir-resħa

Ta’ sqaq mudlam, inkella f’kartolina

Ta’ tnejn jinħabbu.

Alfred Grech

29/06/2014

It- tgħannieqa tiegħek.

It- tgħannieqa tiegħek, sħab li qed itellaq,

Bħal żiffa riħ sajfija

Taħt kwiekeb qiegħedin jibku

Bħal frak tal-ħġieġ imferrex

Li għad trid tirfes fuqu,

Inkella ddommhom waħda, waħda

F’kullana ta’ djamanti.

L-irtokk ta’ fuq ħaddejk

Iwitti biss il-ħofor

Tal-inċertezzi.

Biex fl-aħħar għad ukoll xi darba tgħidli

X’inhu l-assurd,

U dak li jagħmlek mara,

Tgħallimni kif tintlagħab il-logħoba

Li inti qatt ma titlef.

Alfred Grech.

27/06/2014

Ma tu lo sai.

Ma  tu lo sai che devi andare

Attraverso i movimenti di un'altra estate.

Un altro limbo

Quando la routine quotidiana di vagabondaggio

Sara’ spezzata in pezzi

E nei frammenti di uno specchio rotto

Tu  vedrai solo te stesso.

E tu saprai anche

Che questa e’ la voce eterna

Che ti fa sempre  ricordare

Che questo non è il tuo posto

Che questo non è il sogno.

Lascia che tutti gli altri vadano in giro

Facendo sempre lo stesso  cerchio

lntorno alla giostra

Alfred Grech.

26/06/2014

Mingħajr ma nafu.

Mingħajr ma nafu

It-tnejn li aħna tlajna telgħa,

Mnejn tlaqna ma nafux.

Int tgħid li din mhi xejn telgħa, hi triq wietja

Fil-wita tibqa’ għaddejja bla tbatija.

Jien ngħid li tielgħin telgħa,

U nibqgħu nitilgħuha

Bħat taraġ taz-zuntier.

Int mingħalik li għad trid tasal,

U jiena mingħalija

Li wasalna f’tarf l-irdum

Minn fejn nistħarreġ noqgħod

X’ikunu jgħidu l-kwiekeb.

Mingħar ma nafu.

Alfred Grech

25/06/2014

Il-pass li kien imiss.

Il-pass li kien imiss kien għattaparsi,

In-niżla kienet bdiet

U din mhix xi żurżieqa.

Kull ilma jaqta’ l-għatx kien ilma mdardar

Li ħsibtu qtar fl-għajnejn.

Nifsek qawwieni.

Tqanqiliet ruħi, flaġell.

Xewqati tondjaturi

Jew arkati jserrħu t-tempju

Tat-tabernaklu mitbuq tiegħek.

Għajnejk jilgħabu logħoba,

Il-logħoba li llum drajt

U jien bqajt bħal tallab

Imdendel ma kull xifer

F’dak l-intervall ta’ bejn ħarsa u oħra

Nixxabbat mal-irdum li jista’ jtaffi

Is-swat ta’ dil-burdata.

Alfred Grech

25/06/2014

Il-bieraħ ma ltqajnix.

Il-bieraħ ma ltqajnix

U jien ma ħadtx għalija,

Bħal min lanqas ma jaf b’dak li jrid jisma’

U stajt hawn noqgħod waħdi

Gwardjan tal-kwiekeb.

Sar xaqq fil-blat il-bogħod li hemm bejnietna.

Għaddejt b’moqdief f’kajjikk

Mill-oċean ta’ ruħek

Mingħajr ħsejjes

Mingħajr ma sibt xi skoll jew xatt

Fejn noħlom ir-rumanzi

Għad dawl tal-qamar kwinta.

Imbagħad, stennejt tgħannieqa

Tħajjarni nidħol ġewwa

F’dik ir-rokna

Fejn insteraq is-sewwa mill-ġenna.

Jien ma nieħux għalija

Xħin lanqas jimpurtak,

Jew tieħu gost titpaxxa

Tgħodd il-kuluri.

Alfred Grech

24/06/3014

Stajt nieqaf.

Stajt nieqaf, nitfi d-dawl u nitlaq nimxi,

U ngħidlek li ma stajtx, jew kellu x’nagħmel,

Daqs meta nħalli taqa’ l-aħħar strofa,

U l-għanja tieqaf hemm bħal paġna nieqsa.

U stajt ukoll ħallejtek tibqa’ sejra

Bla ma sejjaħtlek lura, l-passi tiegħek

Jitbiegħedu waqt li naqra nibda moħħok

U naħlef li żgur mhux qed jisgħobija.

Ħaddejja saru radda ta’ qawsalla,

Bilqiegħeda noqgħod hawn biex naqsam ħarstek

Jew noqgħod nikkuntempla l-mewġa tal-baħar

Jinduna bl-infinit li hemm quddiemu.

Fil-mera ma ħaristx għax bżajt li nilmaħ

Is-sema mimli kwiekeb jirriflettu.

Alfred Grech

20/06/2014

Tisma’ l-ħoss tal-mixi tiegħi.

Tisma’ l-ħoss tal-mixi tiegħi

Tistaqsi jekk jieniex fil-ġnien tal-eden.

Bħal qlugħ miftuħ moħħi

Jimbotta r-riħ

Jew bżieżaq tas-sapun jinfaqgħu

Bħas-swar jiġġarfu

Penelope toftoq tila.

Hekk issa bil-maqlub bdejt nitgħallem

Dak kollu li tgħallimt

S’issa

U noqtol lid-dragun

Imxeblek fl-għanqbuta tas-setgħa.

Din tkun l-iskuża tiegħi biex nirxoxta

Fil-ħolm li ma nifhimx

Biex nista’ noqgħod nimraħ

In-naħħa l-oħra.

Alfred Grech

19/06/2014

Stenbaħt għax sar il-ħin.

Stenbaħt għax sar il-ħin, mhux għax qomt kmieni,

U l-ħin ilu li sar għal kemm il-darba,

U ħsibt ukoll li naf ma min kont miexi

U f’daqqa waħda sibtni li ħrabt ħarba.

Qanqiena ddoqq sabiex jien fik niftaħar,

Għax bħaż-żunżan li jirgħa qalb il-wileġ

Infittex bdejt jien l-għasel tal-ispirtu

F’kull għar mudlam, f’kull rokna u bdejt ninfileġ.

Għax int il-baħħ, il-ħoss tal-eżiżtenża,

Għarib għalik innifsek kif għal bqija,

Għidli min int biex dan l-istar inċarrat,

Kull xħin jingħalaq bieb, biex niftaħ mija?

Alfred Grech

18/06/2014

Il-bieraħ waqt li ċ-ċpar.

Il-bieraħ waqt li ċ-ċpar kien qed jitkaxkar

Ix-xema inħbiet u l-lejl geddumu ddendel.

Staqsejtek tafx ir-riżultat tal-logħoba

Li kient qed tintlagħab: lanqas weġibtni:

Biex sirt il-konfessur ta’ qalb imriegħexa,

Xħin qam ir-riħ u ebda qlugħ ma tmattar.

Sejjaħtli ġifa u għed li miniex raġel,

Għax xħin il-logħba bdiet, jien tlaqtek waħdek

Mingħajr ma biss urejtek xi kif trid tilgħab,

U inti ħsibt li din ripetizzjoni

Jew xeneġġjat ta’ logħba li ġa ntagħbet.

Il-qamar qagħad jittawwal lilu nnifsu,

U bqajt tistenna l-grillu jaqta’ l-ħemda,

U l-anġli jħokku l-ġwienaħ f’tempju mwarrab

Fejn lanqas jogħla għasfur bit-toqol tiegħu:

Dell misħut fuq skrin tridimensjonali.

Alfred Grech

17/06/2014

Sokor.

Minflok fl-impulsi nisker

Ta’ temp li ma tbassrux,

Ikolli noqgħod nisma’

Rapport li ma tħassrux.

Li kellu jkun sar s’issa

Sinjal maġenb it-triq,

Inkella kartolina

Imberfla b’lewn id-dieq.

Nemusa ddur ma rasek,

Trumbetta ma widnejk,

Tfittixni qalb il-paġni,

Ta’ ktieb li ġie f’idejk.

Minflok tmewwitli s-sensi,

Bħal xewka qalb il-ward,

Iċċarrat ġrieħi jnixxu,

Tibżax, għax qatt mhu tard.

Alfred Grech

14/06/2014

Din l-imħabba ta’ bejnietna.

Bħat-tinwir, din l-imħabba ta’ bejnietna,

Mal-ħajt ta’ dar qadima, nkella marka

Li wrajja tħalli l-gomma meta tħassar

Jew l-għerq li baqa’ fl-art għax mhux bil-barka.

Hemmhekk tibqa’, fil-ħamba ta’ kull kelma

Li ma tingħadx, inkella maltempata

Ta’ dak li qed nistenna u qatt ma jiġi,

Jew fit-tnegħid sfaċċat fid-dlam, stampata.

Bħas sħab migdud quddiem il-qamar kwinta,

Il-ħemda li fil-baħħ għad trid titfassal,

Għajnejja jimxu l-passi ta’ sbuħitek

Li saret dell sfumat li lili jwassal

Sal infinit. Hemmhekk, fejn għad nistenna

Li ġuf il baħħ jiblagħani biex jithenna.

Alfred Grech

13/06/2014

XCV.

Nixxierek ma kull dell xħin jisgħobija,

Imsensla l-ħsibijiet f’kullana ġawhar,

Sibt ruħi hawn għarwien, hekk mingħalija,

Bħal ħmar il-lejl ta’ ħsieb li baqa’ jgħawwar.

Quddiem tgħannieq ix-xenqa wkoll nitħajjar

Li gietni kontra r-riħ hekk kif tħaxwixa

Ta’ weraq għadu jaqa’ r-riħ itajjar,

Jien bandla ta’ tqanqil għax sirt tferfira.

Man-nifs tar-riħ imelles kull tidwira

Buffura ta’ waqtiet ma pinnur bieżel,

Pinġejtek uragan idur f’għdira,

Bqajt iggranfat mal-baga tiela’ u jieżel

Ta’ sidrek baħar jimla’ bla ma tfalli,

Mal-mewġa li waqrajk xħin titlaq tħalli.

Alfred Grech.

12/05/2014

Alkoħoliku.

Kull mistoqsija li qed tagħmel,

Bejn sigarett u kelma b’oħra,

Tpinġija saret fuq il-ġilda,

Imbaghad titfixkel ħaġa m’oħra.

Kemm il-tweġiba qed tistenna,

Jekk qiegħed tiġri ’l-bogħod minn dellek,

Taħrab il-waħx u l-biża’ t’għada?

Malajr ser titlef kull ma kellek!

U kemm il-skuża għandek fil-komma,

Biex tibqa’ tiċħad dak li tara,

Tambur u rasek taħt ir-ramel

Tqaċċat madwarek bil-mannara?

U kemm baqgħalek sabiex twieġeb

Il-mistoqsija ta’ ħaddieħor,

Bejn id-duħħan tas-sigaretti,

Jew ftit serħan bejn grokk u ieħor.

Alfred Grech

11/05/2014

Ma jdejjaqnix.

Ma jdejjaqnix ir-riħ li jonfoħ kontra,

Iż-żrara fiż-żarbun tittorturani,

Il-mewġ tal-baħar jobrom il-burdati,

It-tbissim falz - jagħmilni xi barrani,

Li jaħsbu fuqi n-nies, kull dell li jitfgħu,

Il-ħsibijiet mgħawwġin u twemmin fieragħ,

Ta’ mħuħ dgħajjfin li jħotti dak li nbena

U  jħarbtu dak li l-ġganti bnew il-bieraħ.

Niddejjaq biss xħin jgħaddi ħsieb minn moħħi

Li dak li mmiss u nara hu sensazzjoni,

U min ma jafx, ferħan għax jisbaħ xorta,

U ssib li xejn ma hu ‘kk mhux illużżjoni.

Niddejjaq xħin jgħiduli li jien ħieles,

Minflok jien bħalhom skjav, marbut bil-ktajjen

Tal-liġijiet, drawwiet, morali falza,

Għax inviżibbli l-id tal-mostru ħajjen.

Niddejjaq b’dak il jum li jrid jintesa’,

Għax fih ma ġara xejn, nifs bla tifsira,

Sinjal fi ktieb li baqa’ qatt ma nqara’,

Il-ħajja li m’għexthiex; ta’ bla tifkira.

Alfred Grech

10/06/2014

Ejja nilgħabu ftit.

Ejja nilgħabu ftit:

Hemm barra nieżla x-xita,

Għalik u għal waqt wieħed ir-riħ waqaf,

Ir-riħ kien sewwed qalbu

U ma qal xejn, u waqaf f’daqqa waħda

Bħan-nida fuq il-weraq.

Għajnejnk ħġieġ ta’ filgħodu,

Mal-mewġ tal-baħar xuxtek.

Xuftejja bħad deżert tat-tentazzjoni

U xħn inbus ix-xfar t’għajnejk,

Jinsewna r-riħ u x-xita.

Ħaddejk bħaċ-ċentifolji f’nofs ix-xitwa,

Saqajja qed jitilfu

Il-pass ta’ min is-soltu jimxi waħdu.

                                                            Alfred Grech                                                            

                                                            07/06/2014

Inħażżeż b’ittri kbar ma ġismek kollu.

Inħażżeż b’ittri kbar ma ġismek kollu,

It-tqanqiliet li nħoss biex għad titħajjar,

Bħal qisni qed induq xuftejk tal-għasel,

Inkella nbus farfett li qed jittajjar.

Maż-żiffa riħ kull xħin irewwħu l-ġwienaħ

U nduq il-qtar tal-kwiekeb fuq xuftejja,

U nibda ntir ’l-fuq sa ma tilmaħni,

Jiċkien il-ħin imbagħad xħin tiġi ħdejja.

U nfarfar minn ħaddejk il-frak tal-fidda,

U minn xuftejk l-ilwien ta’ kull qawsalla;

F’għajnejk ileqqu, nilmaħ l-impossibbli,

Għax naf ukoll li d-dinja ta’ min falla.

U mbagħad nittajjar nibqa’ l-fewġa riekeb,

Sakemm fuq dahri nħoss il-qtar tal-kwiekeb.

Alfred Grech

06/06/2014 

Issa li fuq il-mewġ tal-bieraħ.

Issa li fuq il-mewġ tal-bieraħ

Niżlet ix-xemx tal-għass,

Is-sema sar djamanti

Imelles xfar il-blat,

Int miegħi tista’ tgħodos

Fil-baħar tas-sorpriżi.

Tinbet għalxejn il-warda f’nofs ta’ xahari

Tinfed il-blat u tiċħad l-art tat-tama

Għax bħali għad issir. . . indifferenti,

L-allat tisfida u tikber waħdek

Fil-libsa mlaħalħa

Tas-skiet li ma tifhimx.

Jekk trid għad tista’ wkoll tisseqqer tibqa’

Taħt sema li jinfirex mal-burdati

Imbagħad fil-baħħ t’għajnejja tibda tħares

Biex mingħalik trid tikxef għad

ix-xefaq li ma deherx.

U l-aqwa ħaġa tkun xħin jiġi l-lejl

Xħin jaqgħu id-djamanti

U tibda l-avventura.

Alfred Grech

05/06/2014

Xħin nasal fil-quċċata.

Xħin nasal fil-quċċata

Għad tista’ tħoss il-mixi tiegħi

U nkun wasalt.

Imm’issa għadni fit-triq

Inkella tiela’ t-taraġ, tarġa, tarġa,

Indomm  it-tixbieħat f’tapezzerija,

Inħarrek ilma ċatt biex lanqas nilmaħ

Ix-xbieha tiegħi;

Inkella nisma’ noqgħod leħen ruħi

Bħal fewget il-grigal xħin jisbaħ bnazzi.

Għadni ma lħaqtx is-seħer tal-qawwa

Fil-kelma li m’għandiex bżonn ta’ min jgħidha

Mingħajr il-krozzi,

Mingħajr it-ritmu

Mingħajr il-melodija.

Xħin nasal fil-quċċata jkun għalija

Tarf it-tiġrib,

U lanqas ma nkun jien li qiegħed ngħanni

Id-diwi ta’ dak kollu

Li mingħalik int smajtni ntenni.

Alfred Grech

03/06/2014