Vjaġġ Tal-Fantasija.

Titjira għal imkien

Fil-vjaġġ ta’ mingħajr mira.

Din qabża għal ġol-abbiss

Jew ħofra f’nofs għadira.

Mogħodija li ma sibtx

U rkibt il-ferrovija,

U b’hekk ma nafx mnejn bdejt

Dal-vjaġġ tal-fantasija.

Attent għall kull aħbar,

Avviż ta sikurezza,

U bqajt bla ma kejjilt

Kemm tiswa’ ftit ċertezza.

Trid torbot ċinturin,

‘Mma l-ħsieb malajr jiżgiċċa,

Jirranka mhux ħażin,

Ma tafx fejn ser tispiċċa.

Alfred Grech

17-04-2014

Il-Mitjar ta’ Domodedevo.

Bħal merħla nagħaġ misjuqa

Min id li ma taħfirx

Hawn amar mhux imlissen

U xettru ma jidhirx.

Kulħadd ibaxxi rasu

Biex jemmen li jinħtieġ

Iċ-ċinturin jissikka

Min jgħodos qalb il-ħmieġ.

U taħt l-effett tal-loppju,

U nobdu u ma rridux

Kif stajt nitkellem nibda

Bl-ilsien li ma nifhimx?

Alfred Grech

28-04-2014

Burdata.

Il-ħarsa li tiċċajpar

Felula li titrabba’

Is-sema li jiddallam

Fil-qalb mingħajr imħabba.

Il-ħsieb bħax-xagħar imħabbel

Ir-riħ tax-xlokk imdejjaq

Waqtiet bħal zkuk imsebbla

Uġih il-qalb imfejjaq.

Ir-riħ li jġorr quddiemu

Ir-raxx tal-baħar fieraħ,

Ir-raġġ tax-xemx jintilef

Fil-moħħ il-ħabs tal-bieraħ.

Il-ħarsa li tiċċassa

Musbieħ id-dlam tal-għama

U qalb dat-taħwid kollu

Jitfaċċa raġġ ta tama.

Alfred Grech

16/04/2014

Bħal ma dħalt fuq il-ponot ta’ subgħajja.

Bħal ma dħalt fuq il-ponot ta’ subgħajja

Bla ma ħabbat, mingħajr ma tbatbek nidħol,

Hekk nitlaq. Int ftaħt beraħ il-fruntieri

U jien imlejt malajr l-irkejjen kollha

Battala, b’kull ġurnata l’għaddejt miegħek.

Għax issa jtajjru trab ta’ kwiekeb mejta

Riġlejja, u ma tridx terġa’ tħares lura

Biex tgħaraf dak li ġa taf. U jekk jien nitlaq

Inkarkar miegħi ħwejjġi kollha. Nimla

Bit-toqol tal-għażliet valiġġa kbira

Mgħobbija bil-waqtiet fix-xejn moħlija.

 U jekk immur u nitlaq xejn ma ninsa’

Għajr il-biċċiet tal-mera fl-art mitluqa

Li jiena naf li għad xi darba tiġbor

Biex terġa mill ġdid tibni l-mużajk tiegħek.

Alfred Grech

14/04/2014

Il-Kelma.

Li kieku minflok il-verbali

Tinkiteb imqar poeżija,

Minflok il-kliem iebes li jdejjaq

Li tghidhom x’ħin tkun fid-dagħdigħa.

Li kieku dak kollu li ngħidu

Iperreċ tassew x’hemm ġo fina,

Tar-ruħ il-misteri li twelled

U tħalli li ż-mien jgħaddi bina.

Li kieku dal-ħsejjes li tisma’

Kull kelma li d-dinja  jsawwarha

Bix-xeħta, bid-dagha, kull ma tbassar

Fl-imħabba u t-tberik idawwarha.

Kull kelma titlissen u iżżommna

Ġo qafas imsejjsa daqskieku

Noħolqu kull ħin dak li ngħidu

Noħolmu li kien seta’ kieku.

Alfred Grech

15/04/2014

U jien x’jonqosni?

U jien x’jonqosni?

Jekk mhux li naf li inti qed taħseb fija.

Jien il-ħin kollu naħseb fik

U nbus il-qamar,

U jista’ jkun ukoll illi l-lejl tiegħek

Timlieħ b’ħaddieħor.

Imm’int mhux ser tinsieni

Għax hemm marsus ma kull messaġġ li nibgħat

Il-biża’ tiegħi.

Inħokku ma xulxin qiegħedin

F’dil-bitħa eternita’,

U jien niġġerra wara l-kwiekeb

Li jiġġarfu.

Alfred Grech

12/04/2014

Talinqas ħobbni.

Talinqas ħobbni għal dak iż-żmien kollu

Li bqajt bla ma nurik għax qatt ma tlabtni.

Fakkarni wkoll fil-bews misruq li tajtni,

Id-dehexa t’id tiżżerżaq ma ġenbejja.

Fil-leħħa tal-waqtiet. . . tmellis distratt.

Imbagħad ismagħni ejja xħin jibqagħali

Mank kelma waħda biss biex  nista’ ninfed

Il-ħemda solitarja. Ejja aqrali

Iż-żmien fl-isfumaturi tiegħu. Isma’

Id-diwi tat-twerwir  li din xortija

Warajjha tħalli. Jiena riħ fl-irkejjen,

Żarġun ma ħġieġ itekek ta’ kamartek.

Għalhekk nistenna nibqa’ l-aħħar ħarsa.

Alfred Grech.

11/04/2014

Li kieku ma kienetx din l-ossessjoni.

Li kieku ma kienetx din l-ossessjoni

Li nibqa’ ngħanni l-għanja tal-profeti,

Iż-żmien kien jibqa’ għaddej bla ma jinvadi

Is-skiet qaddis.

U li ma kienx għar-riħ li għamel ħerba

Ma qajjimnix minn-nagħas u ċarrat beraħ

Feriti magħluqin fid-dmugħ maħlula,

Jien bqajt stordut.

Għajnejja jduru lura biex jinkixef

Ritratt taż-żmien li għadda, u issa nifhem

Fejn jien illum u minn fejn kont inħares,

U ż-żmien għaddej.

Alfred Grech

10-04-2014

Traxxax ix-xita fuq l-imxarrab.

Traxxax ix-xita fuq l-imxarrab

U nifsek daqs in-nar,

U kull tnehida trewwaħ

Il-ġamar f’nofs il-kamp.

Jien nintilef f’dak kollu li tgħix int

F’dak kollu li taħseb

F’dak kollu li tixtieq,

Imm’int aktarx titlifni bħal muftieħ

Li qatt ma ssibu.

Fuq żiemel bil-galopp

Ilebbtu t-tqanqiliet,

U l-ħsibijiet maħsula

Jiżolgu fuq il-ġilda

Tinfaqgħa ma kull bewsa

Kull qatra t’għaraq sħun.

Imqar il-lożor ħadu l-qagħada

Tal-fantasija tagħna.

Alfred Grech

09/04/2014

Fis-skiet ta’ dawk xufftejk.

Fis-skiet ta’ dawk xufftejk

Illum tlift ir-raġuni,

Burdati bħall-oħrajn

Jinbidlu fi staġuni.

Xtaqt ngħidlek sewwasew

Bid-dudu li jitrabba,

U dan mhux ħmar i-lejl

Kull xewqa tal-imħabba.

Fis-skiet ta’ dawk xufftejk

Tingiża tal-kuxxjenza

Innittef bqajt kulljum

Iż-żmien tal-innoċenza.

Fis-skiet ta’ dawk xufftejk

L-uġih ta’ dawk l-iljieli

Mogħttija b’velu skur

Biss għada għad jibdieli.

Alfred Grech

06/04/2014 

In memoriam

Lil George Vella.

Minn wara twieqi mbexxqa,

Għanqbuta tal-ħadid

Minsuġ min id saħħara

Tistaqsi bla ma trid.

Għaliex ħallejtna u tlaqtna?

U bqajna nistennewk,

Fi qlubna aktar minn qabel

U nibqgħu bla ninsewk.

Fiċ-ċirku ta’ nċertezza

Magħmul mill-frak tal-ħsieb

Jirbombja eku ħieles

Ivenven riħ mal-bieb.

Għaliex ħallejtna u tlaqtna?

Xħin drajna konna sew

Il-ħbiberija tiegħek,

Duħħan is-snin l-għaddew.

Min jgħajjat mhux jinstema’,

Hemm dmugħ li ma jidhirx,

Theżżiż ta' snien u biki,

Dulur ma jitfissirx.

Għaliex ħallejtna u tlaqtna?

It-telfa nitbekkew,

Żdied ieħor fir-ringiela

Li telqu u qatt ma ġew.

B’idejna nħaffru ħofra

Insawwtu ċ-ċpar misħut,

Magħmul min skiet li jraqqad

Fid-dlam tat-trab mixħut.

Għaliex ħallejtna u tlaqtna?

Kont wieħed minn ta’ ġew,

Taċ-ċorma illi bassret

Ġejjieni ġdid tassew.

Alfred Grech

05/04/2014

Meta l-qamar.

Meta l-qamar imiss leħjet ix-xefaq

Int tbiddel il-lewn tas-sema

U b’idek ħafifa

Tqiegħed f’postom waħda waħda

Il-kwiekeb li jitfixklu,

U inti lanqas taf:

Għalkemm il-bogħod u f’dinja għalik

Sirt tafni biss fil-ħemda

Li jiksirha biss

Il-ħoss tal-musika.

Alfred Grech

05-04-2014

Il-lejla erġajt imxejt il-passi qodma.

Il-lejla erġajt imxejt il-passi qodma

Ta’ trejqa mingħajr sbokk u bdejt infittex

Taħbit il-qalb bħal dejjem xħin insejthom

F’idejk battala.

Erġajt staqsejt jienix qed noħlom

Fi ħsiebi qishom badla l-inċertezzi,

Kultant insibek tħares bħal tistaqsi

Għajnejk kurjużi.

Imdawwar bit-tvenvin tar-riħ bdejt nemmen

Fi kliemek ma jaqtax u ma kull bewsa

Ħassejtni qisni anġli jtir fis-sema,

Sakemm sparawli.

Bdejt ngħum fuq biċċa għuda mal-kurrenti,

Għajnejja mitlufin fic-ċpar tax-xefaq

Fejn l-infinit fetaħli l-bibien beraħ;

Komplejt nitbiegħed.

Alfred Grech

03-04 2014

U xejn ma baqa’ llum.

U xejn ma baqa’ llum

Nibbiet li sar żerriegħa,

Duħħan li jogħola ’l-fuq

Fis-sema tar-rebbiegħa.

Ir-ramel jibqa’ biss,

Li jgħaddi ma subagħaja,

U jibqa’ t-tifkiriet,

Mal-mewġ mitluf fil-bajja.

U jgħib bi-mod il-mod

Mas-sħab ta’ sema safi

Inti issa sirt biss xbiegħa

Quddiemek niġi ħafi.

Dak kollu li kont ktibt

Ir-riħ tal-bidla jferrex,

U jogħola bħad-duħħan

Mas-sema griż u mgerrex.

Alfred Grech

01-04-2013