U tista’ ssir ħabiba.

U tista’ ssir ħabiba tiegħi

Inkella tkun maħbuba,

Ejj’imxi int kif int

Ukoll jekk għadek tirrifletti l-qamar kwinta,

U taħbi taħt l-ilwin ta’ lbies li tilbes

Dak kollu li ma jgħoddx għal wiċċ id-dinja.

U jista’ jkun ukoll li ġejt biex tara

Għajnejn ma jitħarrkux

Għajnejn bħaż-żibeġ

Il-ħarsa tal-etern mingħajr tifsira

Dak li ma jgħidlek xejn, rifless fl-għadira

U jien taħt qoxra ta’ bebbuxu mmur ninħeba

Għaliex ma nafx x’irrid jekk tistaqsini.

Alfred Grech

15/07/2014

Lil hinn minn dak li tgħidli.

Lil hinn minn dak li tgħidli
Lil hinn minn xfar għajnejk
Lil hinn minn dak li nara
Il-ħmura ta’ ħaddejk,
Issebbaħ xemx mifluġa
Kull xħin fuq wiċċek nilmaħ
It-telfa tiegħi.

Jien naħtaf dak il-waqt kull meta nilgħab
Il-leħħa ta’ ġenbejk qed jiżżegilgu,
Il-qagħada sieq fuq l-oħra
U d-daqqa t’għajn li tgħidli
Naf x’għandek f’moħħok.

Jien nibqa’ ġej warajk
Biex naħrab lili nnifsi
Fil-mixja li tixxengel
Mat traċċi li tħallili
Tal-għoqod li jinħallu
Taħt it-takkuna.

Alfred Grech
13-07-2014

L-Għanqbuta.

U issa sirna nsetti fastidjusi,

Ġo gaġġa miġburin ilkoll bħal flieles,

U dan lanqas ġie fuqna għall-għarrieda

Xħin konna lkoll reqdin fuq andar ħieles.

Għax din l-għanqbuta ntiżġet wara daharna,

Ma kredu t’għajn għal għajn u sinna għal sinna;

U din l-għanqbuta ntiżġet għax ħallejna

Fuq rasna jitla’ min hu iqsar minna.

U issa ma baqax fejn tisa’ timraħ,

Ġo xibka tat-tkarkir hawn ruħna sibna,

Il-brimba kullimkien għajnejha firxet

U bqajna mistagħġbin kif l-għass rikibna.

Alfred Grech

09/07/2014

Ma jibqa’ xejn.

Ma jibqa’ xejn jekk mhux ir-ramel

Li jiżloq minn mas-swaba ta’ kull wegħeda

Inkella bħal kull kelma li kont tgħidli

U issa insejtha.

Bħas sħab taħt sema safi

Mir-riħ tal-bidla mkeċċi,

It-tqanqiliet, għafsiet il-qalb,

Kull xħin kont tisparixxi.

Għalhekk li jibqa’ llum

Mill-kliem imħżżeż fl-arja,

Mid-dħaħen li joqorbu lejn is-sema,

Hu biss il-ħsieb li għad xi darba

Nitwieled bniedem ġdid

U nħares lejja nnifsi bħal baħħari

Li jilmaħ l-art imbiegħeda.

Issa li s-skiet ġo sidrek rebaħ

Ta’ filgħaxija għanni l-għanja

Ma nżul ix-xemx li jegħereq.

Alfred Grech

08/07/2014

Inħossni fuq il-ġamar.

Inħossni fuq il-ġamar

Xħin noħroġ minn ġol fosdqa

Il-maltempati tiegħek skuri,

Il-vortiċi li jobrom

Il-fdal tal-eżistenza.

Imbagħad mill-ġdid mix-xejn jitfaċċa l-bnazzi

U nerġgħu għal li konna,

Għaliex bħall-ajru tibdel l-istaġuni

U jien ma nifhem xejn,

Għandix inkun il-bugħaddas feliċi

Inkella l-għawwien tajjeb

Biex naqsam l-oċean inkandexxenti

Ta’ dak li lejk isuqni.

Imbagħad nistaqsi lili nnifsi

It tmien, meta se jasal?

Alfred Grech

07/07/2014

U jgħaddu minn quddiem il-bieb ewlieni.

U jgħaddu minn quddiem il-bieb ewlieni

Iħirsa ta’ kuljum fuq ferrovija,

U jiġi ż-żmien li ngħaraf lili nnifsi

Tal-kopji jibqa’ biss in-nstalġija.

Għax fomm ix-xemx mitbuq, ħaddejha sofor

Għal dawk li qatt ma jħarsu lejn is-sema,

U jieqaf għal xi drabi taħbit qalbi

U werqa ittir mar riħ fl-iskart tintrema’.

‘Mma lanqas dlam il-lejl ma jibqa’ jidher,

Biex jgħatti ‘l-dawk li lanqas biss jinstabu,

Li qatt ma kellhom wiċċ u lanqas ħajja

U qatt ma kienu hawn u qatt ma lagħbu.

Alfred Grech

03/06/2014

Xejn.

Ma tintebaħx bil-baħħ li jisparixxi,

Mill-bieb il-kbir tat-tempju tiegħi tgħaddi,

Imbagħad ma nafx fejn tmur tistaħba. Jgħaddi

Jum ieħor illi fih xejn ma jkun ġara,

Fil-ġiri u fit-tvenvin bħal tal-insetti

Fastidjusi, fil-ġlied ta’ ħsibijieti,

Min minhhom jiġi qabel. Fuq bieb moħħok

Ukoll ħabbatt. Ma smajtnix. Ma kontx hemm lanqas,

Inkella ma weġibtx għax kont fis-sakra,

U jien bqajt hemm nistenna, u xħin staqsejtni

X’kont qed nagħmel, ma nafx kif ridtni nwieġbek,

Ma kont qed nagħmel xejn, għax kont qed ngħasses

Bla ma naf ’l-għala, dil-ġrajja li tixxiebaħ,

Inkella qed inħares x’imkien ieħor.

Alfred Grech

02/06/2014

Skiet biss.

Skiet biss hemm fl-isqaqien tat-tama,

U inti ġejt xħin lanqas kont nistenna,

F’idejk iġġorr biċċiet ċaqquf minn qalbi,

Musbieħ il-lejl fuq ħsibijiet imtarxa

Idawwal triqtek.

Ix-xita kienet tiżfen

Taħt sema mimli kwiekeb

Ma ritmi foloz.

Ħallejt minqux ġo ruħi

Iċ-ċikatriċi t’elf mitt ħolma,

Fuq wiċċ is-solitudni l-biża,

L-imħabba tokrob.

Ma biebi nistenniek għalxejn li tħabbat,

Aktarx li tlift it-triq xħin bdejt titlajja.

Alfred Grech

01/07/2014.