Laqtitni x-xemx bħal meta b’ħarsti nolqtok.

Laqtitni x-xemx bħal meta b’ħarsti nolqtok

U nbexxaq il-persjani tal-imħabba,

Ma jitkellmux idejja qabel ħarsti

U lanqas ma jitħallat nifs ma ieħor.

Jingħalaq l-infinit tad-dlam tal-bieraħ

Xħin jegħereq fid-destin ta’ żernieq ieħor,

Int tibqa’ bħal qaddisa fuq it-tila

Jew toqgħod titbissimli minn ġol kwadru.

Minn fejn għaddejt jidhirli li smajt leħnek,

Fil-ħsejjes ta’ ġo moħħi hemm int tgħanni

Dik l-għanja li tfakkarni f’mewġ il-baħar,

Kull rokna rbaħt, il-ħin sar kollu tiegħek.

U jien fil-ħemda waħdi bqajt nistenna

Id f’id ix-xewqa twennes kull tifkira.

Alfred Grech

29/01/2014

Jekk int trid tafni sew.

Jekk int trid tafni sew

Tibqax tghatini bil ħarta;

Ta’ kuljum trid tinża’ l-libsa.

Għax int taħsadni lili

Kemm il-darba

Xħin tinża u tibqa’ temmen dik il-gidba

Li għalmithielek ommok

U int rawwamt matul is-snin

Bla qatt ma stajt tintebaħ.

Trid tafni sew?

Fis eħles mill-għanqbut

U l-brimba li nisġitu

Imbagħad aqbadli jdejja

Ħa mmorru nistaħbew

Fejn ħadd ma jara.

Alfred Grech

27/01/2014

Bit-tajn taż-żebliegħ.

Bit-tajn taż-żebliegħ mingħajr rieda

Għax l-għamad kien kiefer f’għajnejja;

Ma stajtx sewwa nara new nisma’

Is-seħer ta’ kliemek f’widnejja.

Ma smajtx it-tfesfis ta’ kliem sieber

U weħel il-kliem fi griżmejja,

Kont mimli bil-qilla tal-għadu,

Bdiet tgħotor u teħel riġlejja.

Ma nafx jekk smajthiex it-tnehida,

Inħliet ma kull demgħa f’għajnejja

Il-wegħeda ta’ ruħ li tittarraf

U taħfer li ġabet b’idejja.

Alfred Grech

24/01/2014

Is skiet tiegħek.

Is skiet tiegħek bħal ħemda wara karba,

Dak kollu li nkun ktibt int tħassaruli,

Bħad-dieqa xħin bla xemx filgħodu jisbaħ,

Inkella d-dawl jintefa f’nofs ta’ lejla

U nsib li trib għal għandek f’daqqa ntilfet.

Kull bewsa silenzuża li tagħtini

Inqisha triq li minnha ħadd ma jgħaddi,

Fejn jien nispiċċa biċċa mix-xenarju,

Bejn sħab u xemx imdendel qed nistenna.

Imm’inti taf li kull xħin lejk inħares

Insir bħal misraħ nies kulħadd jiċċassa,

Inneżża ċ-ċentifoli fil-ġnien tiegħek

U s-skiet tal-ħarsa tiegħek isir skandlu.

Alfred Grech

23/01/2014

Infittxek biex insibek.

Infittxek biex insibek qalb in noti

Li jdoqqu jdejn esperti fuq il-pjanu,

U nsibek mat-tgħannieqa ta’ xi fewġa

Li f’imnifsejja treġġa l-fwieħa tiegħek,

Qalb l-għana tal-għasafar kull filgħodu

Li jqanqlu l-ħin ta’ ħemda u riflessjoni,

Infittxek biex insibek qed tittajjar

Moħbija wara s-shab tat-tamiet t’għada,

Inkella żżomm f’idejk il-kalċi tiegħi.

Alfred Grech

21/01/2014

Nisirqek.

Nisirqek

Bħal qatra nida

Li tinżel issaffi

U ttaffi

U tnessi

Għal ftit tal-ħin

Il-ħruq tal-imħabba.

Nisirqek

Bħal duwa

Li għal dak il-ħin

l-uġigħ u d-dwejjaq tnessi

tal-marda bla fejqan.

Nisirqek

Bħal leħħa ta’ berqa

Ja poeżija,

U nħażżeż is-sabiħ biex jibqa’ għal dejjem.

Alfred Grech

Suwiċida.

U hekk nibqgħu mexjin

Għax hekk imdorrijin,

L-uġigħ m'għadniex inħossu

U f’qalbna bqajna nrossu.

Għax drajna f’dan l-uġigħ

Kien hemm min għamel bih,

Kien hemm lanqas felaħ

Jinbarax u jinselaħ. . .

Jgħix biss fl-aljenazzjoni.

Alfred Grech

20/01/2014

U għadna nfittxu r-ritmu.

U għadna nfittxu r-ritmu ta’ kull darba

Li bqajna ma żfinniex. U jiena tiela’

U nieżel ma dil-bandla, bejn li jidher

U dak li hu. U domna biex nammettu

Li l-maskri rridu nċarrtu li jaħbuna,

U nħarsu lejna nfusna bħal fil-mera

Għajnejn xulxin. Mill-art il-biċċiet niġbru

Ta’ kull tifkira ndommu mbagħad kullana

Biex niġi nlibbisielek madwar għonqok.

Għax bqajt ma nbaħtx li qed ninġarr mill-ħamla

Jew għal warajk niġġerra qisek ninfa.

U bla ma taf għaliex inti sirt reġina

Ta’ din il-qalb li gada qiegħeda tfittex.

Alfred Grech

19/01/2014

Fil-labirint tiegħek nintilef.

Fil-labirint tiegħek nintilef,

U l-lava qed tbaqbaq ġo fija,

Man-nifs tiela’ u nieżel tnehida,

Taħt qamar bellus mimli dija,

Fid-dalma tal-lejl trid tiżbroffa.

Nimmedita u nħares bla skużi

Żurżieqa riġlejk  bajdanija,

Offerta ta’ idejn ġenerużi.

Fost l-għaraq iqattar u t-togħoma

Tal-mielaħ, ser norqod ftit ieħor,

Għar-rdoss u għas sħana tat-tempju

Għax għada tkun f’ħoġor ħaddieħor.

Alfred Grech

16/01/2014

l-lejla ridt tmur torqod.

Il-lejla ridt tmur torqod aktar kmieni

Għaliex għal qalb li lanqas għada tħabbat,

Ma tridx li ma tkunx hawn u tingħadd xorta.

U jista’ jkun ukoll ma trid titkellem,

Għaliex il-kliem arloġġ bla minutiera,

Xħin jieqaf it-tektik, spiċċalu l-ħabel.

Inkella għaliex ħassejt illi bejnietna

Xejn ġdid m’għadu jingħad; sirna raddiena.

U dawk il-kliem li mdorrijin intennu

X’hinuma nafu qabel ma nlissnuhom,

Għax huma l-istess kliem illi jistenna

Kull wieħed minna t-tnejn li sejjer jisma’.

U mbagħad aktarx li bejnek u bejn ruħħek

Ippreferejt ir-rqad minn xi skakkiera,

Aħjar li ma tkunx hawn milli tintasab

Bħal min mhux qiegħed hawn u jingħadd xorta.

Alfred Grech

15/01/2013

Niktiblek poeżija.

Niktiblek poeżija biex niżvoga,

U niġri qalb l-imgħawweġ tal-imħabba,

Nintefa’ ġewwa baħar ta’ sigrieti,

Nitgerbeb qalb il-faħam bla nittabba.

Inċappas bil-kulur tar-ruħ il-kelma

Minn fejn mill-ġdid jitwieldu dawn il-versi

Bħal leħen bejn il-linji tas-silenzju

L-isess tambur ‘mma taħbitiet diversi.

U bejn tbissima u karba ta’ xi weġa’

Ta’ ġerħa tnixxi d-demm u mhix imfejjqa,

Ta’ dak li xtaqt li kelli nkella tlifu,

Jew dak li wrajja baqa’ f’xi triq dejqa,

U mdawwar mill-ħitan ta’ din kamarti

It-tama tibqa’ biss, it-tisbir tiegħi,

U mnalla għandi l-karta u għandi l-pinna

U l-Muża bħal maħbuba tiġri miegħi.

Alfred Grech

14/01/2-14

Nixtieq li flokok kont.

Nixtieq li flokok kont fuq it-tastiera,

Noħlom il-ġdid, sabiħ dak li jistħoqqli,

Mingħajr biss lanqas naf li dak hu xogħoli.

Nixtieq li flokok kont, bit-tmun f’idejja,

Nissielet, ninżel, ngħola ma kull mewġa,

Mingħajr ma jgħidli ħadd hix passiġġata,

Inkella xi vjaġġ ieħor ta’ skoperta.

Nixtieq li bħalek kont bla ma nistaqsi,

Inkompli nagħmel dak li qiegħed nagħmel,

Mhux nidħak bik biex nieħu dak li ħaqqni

U nħoss li ma kull pass qrobt lejn il-mansab.

Alfred Grech

13/01/2014

Infittxek bejn il-ġwienaħ ta’ xi għanja.

 

Infittxek bejn il-ġwienaħ ta’ xi għanja,

Tvenvin ir-rih fil-liwi ta’ mogħodija,

Tikmix il-blat mikxuf u linji mgħawwġa

F’tal-użinjol il-biki solitarju,

Tal-bewsa li mingħandek qed nistenna,

Li tnaqqas id-distanza ta’ bejnietna.

Imbgħad il-moħħ tal-qalb il-passi jterraq,

Megħluba t-tnejn mill-ħemda ta’ fl-għaxija,

U inti dell fil-bosk ta’ ħsibijieti

Biex f’daqqa waħda nibda ngħannihielek

Tal-baħar l-għanja tbewwes il-ħolm tiegħi,

Tal-kwiekeb tas-smewwiet is-sinfonija

U nintonaw flimkien, il-ħlewwa t’għada.

Alfred Grech

09/01/2013.

F’għajnejk il-kwiekeb jilmaw.

F’għajnejk il-kwiekeb jilmaw ta’ fl-għaxija,

Ħaddejk bħal wardiet ħomor bejn l-imsielet,

Bħal mewġ il-baħar xagħrek, jobrom sieket,

Maż-żiffa riħ li tilgħab bla tissielet.

Xeheda ghasel dawk xuftejk ibewwsu mieles,

U kliemek suffarina tkebbes xema’

Fid dlam ta' qalbi jidwi l-baħħ li tħalli

Kull xħin minn fuq ħaddejja ġġelben demgħa.

Ma nafx x’irrid, għaliex qed tistaqsini?

Kull meta nersaq lejk hemm preċipizzju,

Miżien ta’ dak li nħobb u li hu xieraq,

Xi darba m'hemmx li naqta’ dan il-vizzju.

Alfred Grech

08/01/2014

XCII.

 

Inti ġejt hawn u xgħeltli din ix-xemgħa

Biex mingħalik tagħmilli ftit tad-dija

Fid-dawl ta’ qamar tilma u tleqq kull demgħa,

Qatt ħsibt x’inhi t-tifsira ta’ dis-siegħa?

Tinqaleb ta’ taħt fuq f’dil-kolliżjoni

Tintebaħ tibda wkoll li kien imn’Alla,

Li bdejt bħal friefet naħrab l-illużjoni

Qalb ħafna lwien imħabbla tal-qawsalla.

Int għamel tabirruħek li ħdejk qiegħed,

Id f’id inżommu u nimxu ma' ħaddieħor

Tul-kuritur mudlam ta’ dak li kien imwiegħed

U mingħalina wsalna xi mkien ieħor.

Iż-żmien ngħadduh ninfexxu fi kliem fieragħ

Filwaqt li ntennu dak li kien tal-bieraħ.

Alfred Grech

02/01/2014

Requiem lil Maria Bugeja.

Iddum biex tgħaddi din is-sħaba sewda.

Minghajr ix-xemx kull jum migdud u mgħajjeb.

Il-baħħ ma jimteliex, ta’ min ħalliena,

Mingħajr il-fus, fix-xejn idddur ir-rota.

Bħal meta tqanqal blata minn imkienha

Li tħalli l-fierah, tħalli l-baħħ warajha.

Għalik Marija ddoqq din il-qanqiena

Li tnissel swied il qalb mimlija dieqa.

Tfakkarna li trab konna, trab insiru,

U kollox vanita’, u kollox frugħa:

Buffura rih il-ħajja fuq din l-art minsija.

U mhux lakemm jintiżen l-għali tagħna,

Fil-keffa tal-miżien il-ħsara tqiegħed.

Miċ-ċomb u mill-merkurju hu itqal kliemna,

Mifxul il-ħsieb u dalma fuq għajnejna.

Iddoqq din il-qanpiena, in-nies miġbura

Nagħtuk minn qalbna lkoll tislim tal-aħħar,

Għalik is-sogħoba tagħna, li kont magħna

Fl-inżul u t-tlajja mxejt  ta’ dil-mogħodija.

Għalik din it-tislima tal-qanpiena,

Għax issa m’għadekx magħna, sirt tifkira,

Fid-dlam tal-ħsibijiet, fiċ-ċpar tad-dubbji

Ninfexxu lkoll fil-mistoqsija eterna:

Għaliex il-mewt, għaliex din it-tbatija?

Għaliex bil-mewt jingħalaq ktieb il-ħajja.

Ninfexxu lkoll nistaqsu l-mistoqsija:

Għaliex minn fost kulħadd Marija kienet

Li kellha ħesrem tħalli l-wied qabilna,

Dil-mara li f’ħajjitha dejjem tħabrek

Minn dawl sa dlam biex trawwem il-familja,

Sabiex kull sehem jitkattar u jsir mija.

B’idejha merhijin hi kienet tqawwi

Lill kull min kien jinħtieġ, lil kull min jogħotor.

Min irkuptejħ milwija kienet tqajjem

U twieżen lil magħdur, bi kliemha sieber.

Għax kienet it-tjubija l-qawwa tagħha

U l-qalb qawwija s-saħħa ta’ mġibitha.

Għaliex dawk ta’ bla ħtija qed jintilfu,

In-nies il-ġusti kollha qed jinqerdu?

Iżd’hemm kapitlu ieħor li jinkiteb

Lilhinn minn dawn ix-xtut, lilhinn mix-xefaq.

Fuq xatt l-eternita’, hemmhekk kull ħolma

Tissarraf f’realta’, li hu jsir ħolma.

Hemmhekk hemm l-infinit b’ebda fruntiera;

Hemmhekk il-mard, il-qtigħ il-qalba, kull ħaġa

Li tkidd lil bniedem fl-art hi bla tifsira.

Hemmhekk issaltan biss il kelma “Mħabba”.

Hemmhekk iss’hemm Marija bi tbissima.

It triq ma tilfithiex: Waslet qabilna!.

Galhekk Missier Ħanin f’idejk ilqagħha

Lil din ir-ruh li tant f’ħajjitha ħabbet,

Lil din il-mara siekta u kollha rażan,

Li mxiet it-telgħa kollha bi tbissima.

Ħallieha titla’ t-taraġ tat-tron miegħek

Biex minn hemm fuq hawn isfel lilna tara,

U żommha ħdejk biex tgawdi l-hena tiegħek.

Alfred Grech

05/01/2014