XCIV

Jekk nibda naħseb l’int mintix ħlief blugħa,

Ħolqien il-moħħ u ġenn il-fantasija,

Insib mod ieħor kif ninfexx fil-frugħa

Ukoll jekk għadni fl-art ankrat mal-bqija.

Għaliex mingħajr il-ftit ta’ distrazzjoni,

Il-ħrafa kienet tibqa’ wisq ugwali;

Kull kif trid tibqa’ hemm bħal fissazzjoni,

Mirage fid-dawl tax-xemx f’deżert senswali.

U ngħid li xejn mhu ġdid taħt din il-kappa,

U jista’ jkun ukoll li dan żmien tajjeb

Li nistqasik kontx int kull xħin tiskappa,

Xħin noħlom f’nofsinhar taħt sema’ mgħajjeb.

Noftoqhom u nistaqsi waħda, waħda,

Il-petali tal-ward minkejja ċ-ċaħda.

Alfred Grech

31-05-2014

Għajjiena l-weraq.

Għajjiena l-weraq fuq l-irħam tal-qabar,

Għax baqgħet ma telgħetx ix-xemx li ssajjar,

Lil-fewġa ta’ filgħodu lanqas tbissmu

U lanqas ma semgħuħ il kant li jħajjar.

Ma joħolmux in-nida tar-riħ isfel,

U ma jibkux id-dell tas-siġra ’l-kbira,

U lanqas jagħti każ tat-talb tal-ġwejjed,

Warajhom ma jħallux mank biss tifkira.

Sakemm buffura riħ iġġorrhomm magħha,

Surithom folla mdejjqa fl-attitudni,

Il-bogħod kemm jista’ jkun lil hinn mix-xatba

Hemm fejn is skiet jinbidel f’solitudni.

Alfred Grech

30/05/2014

Ġew reġghu dawk ifittxu.

Ġew reġghu dawk ifittxu

Għax ħasbu li kont jien,

Ma min xebbxuni setgħu?

Jew ħolmu b’dak li kien.

Biswitek irrid noqgħod

Għax ma nafx x’hemm lil hinn mill-eqreb xtajta

Ġew reġghu dawk jistaqsu

Għidilhom miniex hawn

Għidilhom jien assenti

Li lanqas noqgħod hawn.

Biswitek irrid noqgħod

Għax naf li kull xħin trid tiġbidli l-ħajta.

Alfred Grech

28/05/2014

Kien kliem mitluf.

Kien kliem mitluf fuq dawk xuftejk statwarji,

Ħarist f’għajnejk, ħarist lilhinn mis-sema,

Ħassejt il-ħabel jerħi minn idejja,

Bħas-stalaktiti d-dwejjaq, sidri nar jinħema.

U wiċċek kien is-sħab li jtella l-ajru,

Fil-ħemda ta’ fl-għaxija li d-dlam silef,

Ma kellimtnix, ma jmurx il-lejl jisimgħek,

F’ta’ ħarstek l-infit il-baħħ jintilef.

 Bħal gżira fl-oċean, kif stat issibni?

Alfred Grech

27/05/2014

Lil hinn minn dak li tidher.

Lil hinn minn dak li tidher,

Lil hinn minn dak li tgħid,

Inti għamla feminili

Tingħaraf sew bil bgħid.

Lil hinn minn dak li tagħmel

Tħajjarni bla ma taf,

Fl-għanqbuta li qed tinseġ

Nitfixkel bla ma naf.

Min inti għidliu sewwa?

Ħa nara ftit bil-mod,

F’dak kollu lili jqanqal

Ta’ ġismek qed jitgħod.

Nixtieq li miegħek ngħaddi

Iljieli twal sajfin,

Noqgħodu ngħoddu l-kwikeb

U nfissdu lil xulxin.

U xħin irrid jien naħrab

Id-dwejjaq ta’ kull ħin,

Tibq’inti tistennieni

Bħal mara tad-destin?

Tibq’inti lili tagħaraf

Xħin jien inkun inbdilt?

Madwari tibqa’ tiżfen

U tinsa kull m’għamilt?

Lil hinn minn dak li jidher

Li tara u tmiss b’idejk,

Se nibqa’ nara l-ħlewwa

U s-sewwa l-hemm f’għajnejk?

Alfred Grech

26/05/2014 

Mill-ilma matt.

Mill-ilma matt mistħija titla’ x-xemx

U moħħi jibda jegħereq

Fi ħbub għajnejk.

Ġwenħajn tebqet l’għajnejn

Jaħarbu dak li tlissen

U l-folla ħsibijiet bħal masġar ħiemed

Bejn ir-riħan u l-ħsejjes tal-ilma.

Xufftejk magluqa jafu jgħidu

Dwar qlugħ ta’ mingħajr riħ

U xemx li taqli.

Fil-baħar tas-skiet inħossni ngħum

Bħas-silġ jinħall f’wiċċ l-ilma.

Ma jibqax biża’, lanqas għalfejn taħrab

Lil hinn mix-xefaq.

Alfred Grech

26/05/2014

Kien hemm il-baħar.

Kien hemm il-baħar dakinhar jitkemmex,

Żewġ passi ’l-bogħod mar-ramel fejn konna aħna;

Kien hemm il-qamar dakinhar jixxengel

U l-kwiekeb jiżfnu l-walz f’sakra ta’ mħabba,

U ċ-ċief imbikki jgħanni serenata

U d-dawl fil bogħod tad-dagħajjes qiegħedin jaqsmu,

Ix-xefaq li ftit, ftit kien qed jitbiegħed,

U kien hemm inti u jien, erwieħ mitlufa,

Fid-dlam tal-lejl infittxu minn fejn tlaqna

U fejn sejrin f’dil-ġrajja li ktibniha

Mingħajr il-pinna, b’linka li titħassar,

X’ aktarx, li aħna t-tnejn li lanqas nemmnu

Ngħidu ’l-xulxin li din mhijiex ħlief ħolma;

Ma nħallu ebda  traċċja minn fejn ngħaddu,

Ma nħallu ebda għelm li bih ningħarfu,

Ma nħallu ’l-ħadd jintebaħ li konna aħna.

Alfred Gech

21/05/2014

Ħajja.

Taħrablek min idejk

Bħal ħuta xħin taqbadha,

U tħares fiss f’għajnejk

Kull meta trid tiċħadha.

Biex tgħum iżżomm fil-wiċċ

U tasal għax bil-ħniena,

U tkarkar ta’ kull jum

Biex tħajjar xemx għajjiena.

Trid titla’ fuq il-palk

Xħin jagħlaq is-siparju

Dan kollu teatrin,

Kullħadd fl-istess xenarju.

U xħin iġorrna l-wied

Tkun b’saħħtek jew tkun ġifa

Sa fl-aħħar nispiċċaw

Bħal weraq tal-ħarifa.

Alfred Grech

20/05/2014

Il-baħar qed jofroħ.

Il-baħar qed jofroħ biex jikxef

Dak kollu li rmejt wara dari,

Il-gawwi fuq blata jitperreċ

U jgħanni l-imħabba ta’ dari.

Kif nagħmel u nitla’ fuq l-għolja,

Imxekkel bil-ktajjen tal-bieraħ

U nirbaħ quċċata war’oħra

U nirbaħ il-folol fl-imsieraħ?

Bil-lejl xegħelt musbieħ biex indawwal,

Imbierek id-dlam ta’ madwari,

Bdejt nimxi ‘l-quddiem nagħmel bħalhom,

U ġrejt wara x-xefaq aħħari.

Iżernaq u nibqa’ nitnikker,

Nistaqsi għandix indur lura,

Jew ngħmel bħax-xemx hi u nieżla,

Nistaħba biex ngħereq fil-ħmura.

Alfred Grech.

19/05/2014

Sibt ruħi hawn.

Sibt ruħi hawn mitluf fit-trasparenza

Fid-dawl ikkonċentrat ta’ qamar kwinta,

Fanali fl-isqaqien tan-nostalġija

Biex noħroġ minn ġol-għar u nieħu spinta.

Fejn qagħadt nikkuntemplak tul ħajti kollha

Nistenna d-dawl tal-beraq u s-sajjetti

Li jaqsmu skiet il-lejl minsuġ bl-iskandli,

Fiċ-ċirku tond li mxejt mingħajr trumbetti.

U d-dlam fl-għammieq jirbombja l-eżistenza

Xħin noħlom żernieq ġdid u naħrab ħarba,

Met’int ma tkellimnix għax ħadt fastidju,

Jew tħabbat ma terġgħax għal kemm il-darba.

Alfed Grech

17/05/2014

Kull xħin ir-riħ idur.

Kull xħin ir-riħ idur jien nisraq nota

Minn dawk li hemm imdendla par imsielet

U s-skiet sar qisu d-diwi u reġgħa bdielu

Bħal kliem ma riħ mitluq minn xuftejn qarsa

Stampati fuq il-ġilda, kliem imtenni

Ta’ lirika ndelibbli, wild il-frugħa

U s-skiet mil-leħen għandu ta’ xi mutu,

Inkella l-ħoss tal-ktajjen qed ikaxkru

Fil-ġimgħa l-kbira t-toqol ta’ ħtijieti,

Bħar-riħ migdud li jgaħddi bejn il-kordi

Inewwaħ dak li qatt ma seta’ ġara.

Kull xħin fuq rasi tiġi int tittajjar,

Iddallam bi ġwenħajk jum għadu jisbaħ

Bħad-dellijiet impittra fuq sħab kiebi,

Erwieħ jaħarbu d-dawl. Filwaqt li l-qniepen

Itappnu bid-daqq tagħhom skiet jisseqqer.

X’imkien lil hinn mix-xefaq hemm il-misraħ

Fejn inti u jien xi darba għad niltaqgħu.

Alfred Grech

16/05/2014

Mhux inti u lanqas jiena.

Jekk inti ġo did-dinja b’idek f’idek

Ġejt; hekk għad trid tmur, xejn ma tieħu miegħek,

Kif tgħid li għandui ntik, jew għandek tieħu

Jekk miegħek xejn ma tieħu, xinhu tiegħek?

U min hu dan il-mostru li jissejjaħ

Is-soċjeta’, l-Istat u min jimponi l-piena?

Lejn min hu l-ħlas li joħroġ mill-kundanna,

Jekk m’huwa ħadd. Mhux inti u lanqas jiena.

Alfred Grech

15/05/2014

Int biss poeta.

Tieqaf hemmhekk tistenna,

Hemmhekk fejn il-fanali

Ma jixgħelux,

U l-qlub tad-demm u l-laħam

Lanqas uġigħ ma jħossu.

Qisek tallab mitluf,

Tħabbat il-bieb tal-inċertezzi

Fit-toroq qodma

Tad-delużjoni.

Qisek fanal bil-lejl,

Fis-skiet mank sens ma tagħmel

Bħax-xibka tan-nassaba.

Qisek lupa li tnewwaħ

l-iskandli ta’ bil-lejl. . .

bukkun qed tfittex.

Imm’int mint qisek xejn,

Int biss poeta.

Alfred Grech

14/05/2014

Tfesfisli f’widejja.

Tfesfisli f’widejja

Il-holm ta’ kwiekeb jgħumu

F’wiċċ baħar iffullat bid-dwejjaq tiegħi,

Bħal gżuż ta’ galassiji qed jitbiegħedu,

Bħal bżieżaq li jinfaqgħu.

Xuftejk ċiras mitluq

Itenni ġrajjiet muti

Li nġarru mal-irwiefen.

Tfesfisli ġo widnejja

Id-dalma tal-għerien

Duħħan is-sema mċajpar

Imberfel b’dawl ix-xemx

Li qatt ma telgħet.

Il-harsa siekta tiegħek

Hi biża u qtiegħ il-qalb

Ta’ baħar inkurlat

Li fih qed negħerqu.

U ġewwa fija tiela’ l-ajru

Fuq swied il-qalb tal-bnazzi.

Alfred Grech

13/05/2014

Nisirqu ftit tal-ħin.

Nisirqu ftit tal-ħin bejn att u ieħor,

U nistenniek fis-siegħa qabel jisabaħ,

Fil-ħemda xħin id-dlam hu fl-eqqel tiegħu,

Fid-dlam bla qiegħ, fid-dlam ta’ mingħajr isem,

Biex nerġa’ nisma’ leħnek f’qiegħ il-ħemda,

It telf  li ma ħassejtx, il-mewt ta’ dejjem. . .

Nistrieħ fid-dlam tal-lejl xħin kollox jitlef

Dawk ix-xeħtiet li bihom kien jingħaraf,

Fid-dlam jintilef kollox; kollox jerġa’

Għall-anonimita’ tal-ħajja eterna.

Id-dlam f’wesgħat il-ġuf qabel titwieled

U fiħ l-erwieħ jilgħabu mistoħbija,

Il-maskri jitneħħew, ħadd ma jingħaraf,

U ma jkun jidher ħadd, kull dnub jinħafer.

Alfred Grech.

12/05/2014.

Kewkba Rubina.

Kewkba Rubina

Tilma fuq torri

Tifqa’ s-sorpriżi

Jekk mhux imdorri.

Kewkba rubina

Tiddi flgħaxija

Tiddi filghodu

Ħamra u mimlija.

Kewkba rubina

Ruħ il-foħrija

Fl-ogħla quċċata

Ġahwra mdemmija.

Kewkba rubina

Taħkem fin-nassa

Tnessi l-għanqbuta

Ħolma tal-massa.

Alfred Grech

24-04-2014

Ikolli nbaxxi rasi.

Ikolli nbaxxi rasi u ma nurikx

Dak li għajnejja jridu jgħidu,

Kull xħin subgħajk imissu l-kordi mielsa

Tal-arpa li ntunat is-sinfonija,

Stqarrija ta’ kull xewqa u kull tqanqila

Tkexkix li jqum xewk, xewk, u jompli jikber

Sakemm fix-xejn jispiċċa

Bħal mewġ xħin fl-oċean

Qatra ilma taqa’.

Alfred Grech

08/05/2014

Misraħ Aħmar.

Tispiċċa tieħu nifs il-ġewwa,

Jonqosha r-ritmu l-poeżija,

Hawnhekk titlef il-kliem il-profezija,

Hawnhekk fejn jisgħobija l-ħajja,

Tistordi l-kelma u ma nibqghux niftiehemu.

Hawnhekk fejn jaqa’ d-dlam fuq dil-ġurnata,

Hawnhekk fejn indur lura għax nitlef triqti,

Fejn l-univers fi tnejn jinqasam,

Hawnhekk fejn isejjaħli dak li ngħix

Biex bih niftaħar.

Alfred Grech

21-04-2014

Id-daqqa t’għajn li tajtni.

Id-daqqa t’għajn li tajtni hi biżżejjed

Biex tnixxef kull nixxiegħa t’ilma ġieri,

Ir-ritmi ta’ qalb tħabbat twaqqaf sobtu,

U n-nifs li jgħaġġel aktar mis-sekondi.

Inti l-abjad tas-silġ li qatt ma niżel;

Inti dawl taż-żernieq li qatt ma sebaħ.

Kull ħsieb li jiġi f’moħħi hu bħal ħabel

Marbut iżommni miegħek qisni mixli,

Daqs meta nħoss subgħajk mingħajr ma tmelles

U r-riħ ta’ lbiċ idarras sema mgħaddab.

M’hemmx nar li jista jasaħħan din il-kesħa

M’hemmx xita li se ttaffi n-nar iħeġġeġ.

Is-skiet iħalli għelm bla ma jistaħba

Inkella jdur mar-riħ mingħajr ma jaħrab.

Alfred Grech.

06/05/2014

Illum imxejt fit-toroq iffullati.

Illum imxejt fit-toroq iffullati

Bit-tama li nitaqa ma xi ħadd

U ngħaddi siegħa,

Minflok sibt ruħi qed niġġerra

F’mergħat il-ġenn.

Illum ħassejt li qiegħed nilgħab logħoba

Min jaf jekk hix il-ħajja stess il-logħoba,

Kull xħin jien niġi ħdejk biex titbissimli

U b’hekk tnessini d-dieqa li nġorr miegħi,

Is- sens tassew tal-ħajja?

Vetturi jgħaddu jvenvnu mingħalija

U jiena nibqa’ għaddej fuq il-bankina,

Imbagħad kull xħin insibni waħdi

Imdawwar bil-ħitan tas-solitudni,

Min jaf jekk għadx tiġini x-xewqa tiegħek,

Għax għandi bżonnok?

Imqar f’dawk il-waqtiet li kont taħsibni

Xitan, miniex ħlief anġlu.

Alfred Grech

05-05-2014

Iċarċru l-ħsibijiet.

Iċarċru l-ħsibijiet ma ħitan qodma

Fid-dlam il-ħemda taħkem ruħ weħida,

Filwaqt li x-xita tiżfen fuq il weraq,

Tal widna r-ritornell mal-ħġieġ tat-tieqa.

Fuq wiċċ li mank jingħaraf demgha ġġelben

Li tixxutaha dik l-id għax imdorrija,

Mal passi tqal ikaxkru taħt l-arkati

Ma żżomx il-pass mal-ħsibijiet kull kelma:

Għax kull tibdil fit-temp mhux ser ibiddel

Ir-ruħ li ma tidhirx kif tkun minn barra.

Alfred Grech

03-05-2014