Ħajja.

Taħrablek min idejk

Bħal ħuta xħin taqbadha,

U tħares fiss f’għajnejk

Kull meta trid tiċħadha.

Biex tgħum iżżomm fil-wiċċ

U tasal għax bil-ħniena,

U tkarkar ta’ kull jum

Biex tħajjar xemx għajjiena.

Trid titla’ fuq il-palk

Xħin jagħlaq is-siparju

Dan kollu teatrin,

Kullħadd fl-istess xenarju.

U xħin iġorrna l-wied

Tkun b’saħħtek jew tkun ġifa

Sa fl-aħħar nispiċċaw

Bħal weraq tal-ħarifa.

Alfred Grech

20/05/2014