Xħin.

Xħin jieqfu jtambru t-tnabar ġo widnejja

U kliemek bħat-trumbetti ta’ twissija,

Jien nerġa’ mmur nistrieħ f’dirgħajn ix-xtajta

Li lesta li tilqgħani fit-tnissija.

U sehemi jkun is-skiet u l-ħemda mċarrta

Mil-krib ta’ xi gawwija ttir imġewwħa,

Jew mit-tkarkir tal-mewġ taħt xemx għarqana

Inkella żiffa riħ ma wiċċi mrewwħa.

Xħin tieqaf issabbatni ma kull naħħa

Jew trossni ġewwa l-morsa ta’ xewqatek

Aktarx li jien imbagħad f’qoxorti nidħol

Nixtarr il-kongetturi ta’ min bagħatek.

Għal kenn u rdoss ta’ din il-qalb mifnija

Għax jien irrid ninqata’ ftit għalija.

Alfred Grech

05/03.2016

Sara Perche’

Se Io mi rallento

non e’ perche’ adesso ho dei dubbi.

Se Io mi fermo qui

sara’ perche’ il cammino ormai

e’ diventato piu duro.

E se no ti accompagno piu’

non e’ per codardia

ma perrche’ le distanze tra di noi

sono allungate e ti sei diventata

piu’ bella.

Alfred Gech

18-02.2016

U meta se taqbeż?

U meta se taqbeż?

Int għadek trid issib il-pjattoforma

Minn fejn lil-mewt ġo wiċċha tibda tħares

Turini kemm sirt taf, kemm int ta’ ħila

Li tħares f’wiċċ il-mewt u lanqas tibża’.

Imm’int qed tħares f’wiċċ il-baħħ,

Mintix qed tara

Ix-xifer ma qbistux

Bħall-iblaħ  li jittarraf.

Aqbeż, meta ser taqbeż?

L-udjenza qed tistenna,

Jew għadek trid tixxabbat xi ftit ieħor

Ma blat żellieq?

Qed tfittex l-ogħla niċċa nkella toqba

Mnejn tħares f’wiċċ il-mewt.

Jew din hi messa in scena

Biex tara kif ser jgħaddi l-ħin

U lili tiġi tgħidli

Li ma kien xejn u kollox għattaparsi.

Alfred Grech

04/08/2014

Bħall-ilma.

Bħall-ilma mill-ghejjun jinżel u jsaqqi

Ix-xtieli fil-ġnien tiegħek

Jew jitħallat mal-ilma maħmuġ ieħor

u fil-widien jispiċċa jintilef. . .

hekk huma ħsibijieti għalik

maħbuba tiegħi

kultant fit-tifkriet nitilef

tal-baħar li fih negħerq.

U jekk ma noffrilekx xi bukkett fjuri

Inkella xi ċurkett

Dak kollu li minn moħħi bħal valanga

Lil ħsiebi jinfed, friefet il-lejl isir,

Ma sbieħ il-jum jitilqu.

Tassew li l-ħolm li noħlom

Iġiegħelni nqum għal kemm il-darba

F’nofs ta’ lejl

U sieket nippassiġġa

Nistaqsi lili nnifsi u kull tqanqila

Twassalli fewġa siekta

Il-ħlewwa fuq xufftejtk u kliemek sieber.

Alfred Grech

20-08-2009

Dari kont int timbuttani.

Dari kont int timbuttani

Illum huwa jiena li naħrab.

Dari kont int li tfixkilni

Illum huwa jien illi nħares

Narani ftit ftit qed nitbiegħed

Miċ-ċentru tal-orbita tieghek.

Ftit ftit qed nagħmel bħalhom

U b’hekk qed nagħamel f’siktu

Miżien li qatt mhu mdaqqas.

U qatt mhu se jiskot il-leħen

Ta’ dak illi qatt ma jkun nieqes

Ta’ dak illi jafni minn ġewwa

Ta’ dak li jagħmilni hekk ħieles

ta' dak li jagħmilni hekk nobbli,

Ta’ dak illi hu jien innifsi.

Alfred Grech

1-08-2014

2.30 a.m.

U tista’ ssir ħabiba.

U tista’ ssir ħabiba tiegħi

Inkella tkun maħbuba,

Ejj’imxi int kif int

Ukoll jekk għadek tirrifletti l-qamar kwinta,

U taħbi taħt l-ilwin ta’ lbies li tilbes

Dak kollu li ma jgħoddx għal wiċċ id-dinja.

U jista’ jkun ukoll li ġejt biex tara

Għajnejn ma jitħarrkux

Għajnejn bħaż-żibeġ

Il-ħarsa tal-etern mingħajr tifsira

Dak li ma jgħidlek xejn, rifless fl-għadira

U jien taħt qoxra ta’ bebbuxu mmur ninħeba

Għaliex ma nafx x’irrid jekk tistaqsini.

Alfred Grech

15/07/2014