Jekk nitilqek.

Jekk nitilqek, titlaqni

Mingħajr ma tkun doqt l-għasel

Tan-naħal illi jirgħa

Fuq is-sagħtar ta’ xfar l-irdum

Fejn ibejjet il-bies għar-raxx tal-baħar.

Jekk nitilqek titlaqni

Mingħajr ma taf il-għala

Kont ghedtli kelma b’oħra

U jien emmintek

Għax nemmen fis-sbuħija.

Jekk nitilqek titlaqni

Għaliex din kienet il-ġrajja

Li t-tnejn li aħna rajna

Minn qabel il-tarf tagħha.

Alfred Grech

28-02-2014.

Bdejt tħares lejja.

Bdejt tħares lejja qisek dawl ta’ qamar

Li jmelles wiċċ il-baħar,

Ir-riħ li ‘l-qlugħ qed jimla’

Tal-bastiment ta’ħajti

Mitluq bejn sema u ilma.

Xi minn daqqiet bħal-leħħa tad-djamanti

Tax-xemx li qed titbissem fuq wiċċ l-ilma

Saru dawk xuftejk.

Inti tila li fuqha l-ilwien nifrex

Tal-ħolm illi bik noħlom,

Inkella żiffa riħ ma wiċċi tmelles

Il-ħmura taż-żernieq xħin jisbaħ l-għada.

U kull fejn tkun jien żgur insibek

Għax nagħraf id-dell tiegħek

U l-marki ta’ saqajk minn elf mark’ oħra.

Alfred Grech

24-02-2014

Kaskati ta’ kurrenti li jġorruna.

Kaskati ta’ kurrenti li jġorruna:

Jien bugħaddas fil qiegħ kull xħin nitlewmu,

Insibu ruħna ngħumu mal-baleni

Inkella maħtufin ġo xi belliegħa,

Għadira tajn li lanqas tirrifletti

L-ikħal tas-sema.

Fid-dlam tal-lejl m’hemm lanqas kewkba tiddi,

Id-diwi nisma’ biss ta’ kliemek aħrax,

Iż-żmien għaddej maħrub bla ma jistenna,

Int sirt l-eternita’ u jien bqajt ħabsi

Għax ħadt għalija.

Alfred Grech

U issa xħin tlaqt inti.

U issa xħin tlaqt inti

Id-dawl ukoll intefa’

U kif ser tara timxi,

Fil-wied tal-boghod li jifred

Issa minn għal dejjem?

U issa li tlaqt inti

Taħbit il-qalb intesa’

Lilhinn minn dawn il-ħofor

Fejn tgħereq hemm il ġenna.

Qalb mewġ it-tqanqiliet

Int bqajt hemm dejjem tgħarrex,

Sirena fuq il-blat

Sibilla fommok sieket.

Fil-vini maltempata

U kliemi weraq niexef

Misjuq mil-ħin għaddej

Fantin fuq żiemel riekeb.

Id-dwejjaq saru usa

Mill-univers jitmattar

Ta’ bżieżaq li jinfaqgħu

Fuq sodda mhux mifruxa,

Taħt sema mingħajr qamar.

Kull ħsieb bħal ward miftuħ,

Inkella xewk iniggeż

U nħoss in-nifs qed jonqos

U ngħereq bla nitniffes.

Alfred Grech

21/02/2014

Bħal zewġt ikwiekeb.

Bħal zewġt ikwiekeb int u jien ipetptu,

U ngħemżu lil xulxin bħal qed insellmu,

U naqsmu ma xulxin li nsiru nafu

Minn dak illi naraw bla ma nitkellmu.

Nixgħelu int u jien bħal żewġt ikwiekeb,

Nitkellmu ma xulxin minn rokna għall-oħra

Ta’ din l-immensita’ fil-baħħ u d-dalma,

U waħda ma taqsamx jekk mhux mal-oħra.

Nixgħelu int u jien bħal żewġt ikwiekeb.

F’dan l-univers hekk kbir ma tismax ħossna,

Nilluminaw id-dlam li jdur ma dwarna

U ngħelbu dad-destin li qed irossna.

Alfred Grech

17/02/2014

U għadni nistenniek.

Kull meta ġejt narak, staħbejtli wara l-kwinti,

U żgur li mhux għal kliem li ma stajniex niftehemu.

Kull meta ġejt narak, int dort mal-kantuniera,

Għalkemm stajt naf fejn kont, biss wiċċk ma stajtx nara.

Kull meta ġrejt warajk malajr rajt kif sgiċċajtli,

U żgur li mhux għaliex int eħfef aktar minni.

Kull meta ġrejt warajk u lanqas qatt ma lħaqtek,

Ma kienx għax qtajt in-nifs, jew tiġri aktar minni.

Imbagħad kull xħin fittixt fis-sotterran ta’ qalbek,

Il-qiegħ bqajt ma sibtux, x’imkien hemm tarġa’ nieqsa.

Kull xħin ħarist f’għajnejk bħal qisu bdejt inħares

Fuq xefaq l-infinit, inħares minn ġot-tieqa,

U għadni nistenniek titfaċċa hawn quddiemi.

Alfred Grech

17/02/2014

It-Telgħa t’Għammar.

Ma nafx kif f’daqqa waħda

Dan kollu ġie għal fuqna,

Għax qisu kien il-bieraħ

’Mma l-bieraħ baqa’ jsuqna.

Ma nafx kif f’daqqa waħda

Ġiet l-għajja tax-xjuħija,

U f’daqqa l-mixja qsaret

U kollox jagħmel bija.

Ma nafx kif f’daqqa waħda

It-telgħa tal-kalvarju,

M’għadnix nitlagħha niflaħ

Biswit dan is-santwarju.

Għax bewsa minn ta’ Ġuda

Kien l-ors u l-ferħ tal-ħajja.

Ma nafx għaliex qed nibża’

Ma nafx għax qed nitlajja.

Nistenna jisbaħ għada

Biex toħroġ il-kundanna,

U nitlaq darba għal dejjem

U ma nibqax nitqanna.

Alfred Grech

16/02/2014

Pinġejt sbuħitek.

Pinġejt sbuħitek b’dawn subgħajja fl-arja

Għannaqt it-tixbieħat li bdejt ngħannilek,

Ix-xemx bdiet tħares l-isfel u tidħkilna,

U tħassar il-jiem kollha ta’ kemm ilek

Nieqsa minn hawn.

Għax aħna bdejna nidwu l-baħar ħiemed,

Is-skiet tat-tbassiriet li r-rih ġabilna

Is-sħab li jtella’ l-ajru biċċa biċċa,

Ix-xita rxiex li tinżel biex taħsilna.

Imqar is-sema, baqa jistenniena.

Alfred Grech

13/02/2014

Jitkellem għad il-ġebel. 

Jitkellem għad il-ġebel ta’ dax-xagħari

Mal-passi ta’ min xjieħ u beda jogħotor,

Ta’ min fil-jasar twieled jgħid il-ġrajja,

Ta’ min iġorr il-ktajjen tat-tbatija,

Ta’ dawk l-allat li rifsu dan il-wileġ

Għaġuna, għamluna lsiera tal-minjieri,

Ta’ xemx li kull ma jmur tikkarga u risreġ

U tħarbat ħolm id-dieqa f’nofs ta’ raqda.

Il-lejl imur u jiġi bla ma jnebbaħ

Il-ħemda tal-għajnejn mimlija sabar,

Id-dwejjaq jisparaw ix-xewk u l-vleġeġ

Biex jinfed dak li qatt ma sab is-sabar

B’nuqqas ta’ rqad u ħolm bħal sodda mħabbla,

Bħax-xita li ma xrar ta’ baħar mgħaddab

Tissieħeb, taqta’ n-nifs tar-riħ qed jisgħol,

Bħal ġgant li staħba war l-kantuniera.

Alfred Grech

12/02/2014

F’għajnejk hemm il ġejjieni qed iberraq.

F’għajnejk hemm il ġejjieni qed iberraq

Waqtiet li fihom jien ma nkunx inħares,

U xħin ma tistenniex naqlagħelek bewsa

Fl-irdum ta’ tifkiriet ta’ qalb għarwiena.

Kull xħin bdejt tħares lejja bla titkellem,

Kull meta rasi nqiegħed fuq l-imħadda,

Ħassejt minn wara l-bieba s-solitudni

Nitkellem ma l-imgħoddi u nerġa’ lura.

U nħossu qed jinħaraq biċċa biċċa

Ritratt tat-tifkiriet tas-snin mgħoddija

U mbagħad inħoss xi ħaġa fuq l-istonku.

Kullana kliem sabiħ indawwar m’għonqok

Biex nikxef is-sigriet taż-żifna mqansħa

U jista’ jkun ukoll li dina l-għanja

Li ta’ kuljum ngħannilek, għad tindara.

Alfred Grech

10/02/1024

Kemm ilek li ġejt inti.

Kemm ilek li ġejt inti

Ma kienx hemm x’ nista’ nagħmel

Jew ngħidlek: mhux hawn qiegħed,

Inkella nrabbi l-qoxra

Ftit ftit nibda nitbiegħed.

U issa lanqas naf

Jekk moħħi hux jiċċara

Għax demmi qed ibaqbaq

Qed nimxi bla ma nara.

U issa lanqas naf

Dan kollu x’jista’ jfisser

Nixxengel u nitbandal

Inħoss li qed nitkisser.

U issa lanqas naf

Imħabbtek fejn hi qiegħeda,

Ma mewġ il-baħar niżfen

Fuq ilmijiet imbiegħeda.

Tqanqalni dik il-ħarsa,

Imm’issa sar il-ħin.

Waqqaf ix-xemx, orbotha!

Biex tisreġ bla ma tnin.

Imbagħad ma nafx x’ikun

Xħin jieqaf dan ir-ritmu,

Xħin jieqaf ta’ bejnietna

Il-kliem. . . imbagħad nitbikkmu.

Alfred Grech.

08-02-2014

Kif tista’ qatt tifhimni.

Kif tista’ qatt tifhimni

Jekk int ma tintebaħx

Bil-ħmura ta’ filgħodu

Mingħajra ma jsebbaħx.

Naħsibni kemm il-darba

Qed nonsob mhux għal ftit,

Nitfixkel fix-xbiek tieghi,

Ninqabad  ta’ sikwit.

Bżaqtilha fis-sunnara

Lil dik li fit-twelid,

Xi darba lili sellmet,

Kuljum ngħix fit-theddid.

Bħal xbejba li tisfratta,

Nittajjar bħal gamiem,

Mingħajr ma noqgħod naħseb

Kemm għad fadallu t-tmiem.

Alfred Grech

07/02/2014

Jistax ikun?

Jistax ikun fid-dħaħen tat-tifkira

Ta’ dak li ma tifhimx hemm it-tweġiba?

Il-ħajja mhix hlief  kuda fir-rutina

Biex dak li jitlef ħajtu jerġa’ jsibha.

Xħin tħossok li weħilt fil-ħjut t’għanqbuta,

U ma tistax tinqala’ minn ġol ħama,

Jew tħossok qisek nemlu lanqas tidher,

Għalxejn leħnek tgħollih għax mank tinstema’;

Xħin tħossok li għodost taħt mewġa kbira

U fuq il-blat m’hemm ħadd inewwel idu,

Staqsejt jekk hemmx xi ħadd it-tila jinseġ

Jew id-disinn jitfassal kif tkun tridu?

Alfred Grech

06/02/2014

Bil-lejl in-ngħas qed jirkeb.

Bil-lejl in-ngħas qed jirkeb,

U l-għejja ta’ mal jum qed tagħmel tagħha.

In-nar ta’ ġol fuklar inin u jbatti,

Buffura riħ ġarritna magħha.

Jekk mhux qed tħoss in-nuqqas tiegħi

Aħjar li ma nibqgħux nitkellmu.

Fuq blat zellieq nitgerbeb minflok niżloq:

Il-waqt li lil xulxin insellmu.

Jekk tħoss li qed titbadal b’ritmu ieħor

Aħjar li ma nibqgħux fuq l-istess skala,

U lanqas għandna niżfnu żifna waħda

Jew jiena li bqajt niżfen bla naf l-għala.

Alfred Grech

05/02/2014

Nixtieq nistordi.

Nixtieq nistordi d-dinja bl-għajjat tiegħi

Fil-ħemda ta’ bil-lejl xħin kulħadd rieqed,

Bħan-nar mingħajr ix-xrara li kebbsitu

Bħas-sħaba mingħajr sema li taqlagħha,

Bħad-dmugħ fir-riħ iġelben ma ħaddejja

Bħax-xemx li ma ssaħħanx fl-eqqel tax-xitwa

Bħaż-żmien li ma jgħaddix filwaqt li għada

Jintilef il-kulur ta’ kull tifkira.

U nsibni nara l-bogħod mill-eqreb għolja

U nħażżeż fuq ir-ramel kliem ta’ mħabba

Bil-biża’ li ma nafx għax ġejt infittxek

Mal-fwieħa li tintilef qalb ix-xahari.

Alfred Grech

04/02/2-14